Arnat inuusuttut ikiaroorniarlutik akiliingaatsiartarput
Ajornartorsiut nutaajuvoq paquminarlunilu, taamaattumillu arnat taama iliortartut qasserpiaanersut oqaatigiuminaappoq. Maannakkorpiarli ajornartorsiutaavoq, pisortallu nivissat 'haship arnartaanik' taagorpai.
-Assut isumannartoq saqqummiussimavara; inuusuttut ikiaroorusunnertik pissutigalugu timertik tunniuttariaqartaraat. Inuusuttut arnat oqaloqatigisartakkat ilaasa, allatut ajornartumik, ikiaroornartumik akilerneqarnissartik pissutigalugu imminnut tunniuttariaqartarnerat , Nuna Tamakkerlugu Ilitsersuisarfimmi pisortaq Else Poulsen KNR-imut oqarpoq.
Arnat pineqartut peroriartornerat imaannaaneq ajorput, ilaallu kinguaassiuutitigut atornerlugaasimasut Else Poulsenip oqaluttuaraa.
-Nalunngilarput, soorlu peroriartornermi atukkat imatut oqimaatsigisarput, immaqa atoqatigiinnermut isiginnittaaseq allanngorujussuarluni, imminut tunniuttoqarsinnanngorsinnaasarpoq, Else Poulsen oqarpoq.
Aamma atuaruk Hashitortarneq bingortarnerlu ajornarsiutaajartuinnalersut
Ajornartorsiut alliartorpoq, kisianni arnat inuusuttut ikiaroornartussasiumallutik atortittarnersut qassiunersut ilisimaneqanngilaq.
-Taanna ajoraluartumik oqaatigisinnaanngilara, kisianni nalunngilarput inuusuttut akornanni 'haship arnartai' oqaluuserineqartartut, Else Poulsen oqarpoq.
Taamaammat inuusuttut inersimasunit eeqummaariffigineqarnissaat, Else Poulsenip ujartorpaa.
- Isumaqarpunga inuusuttunut iluamik eqqumanissaq pingaaruteqartorujussuusoq, soorlu hashi pilerinarunnartillugu, kisiannili ataatsimoorfigisinnaasanik aaqqiiniarnissarput, Else Poulsen oqarpoq.