Arnat inatsisartuni ilaasortanngortussat amerlissangatippaat

Tyrkiami inatsisartunut parlamentimut sapaatiuppat qinersisoqassaaq, arnallu ilaasortaasut amerlinissaat ilimagineqarpoq.

Arnalli inatsisartunut ilaasortaasut amerligaluarpata ilaasortat quliugaangata qulingiluat angutaasarnissaat ilimagineqarpoq.

Inatsisartuni inissat 550-iupput, arnallu 55-it tikillugit ilaasortanngornissaat ilimagisaavoq.

Arnat parlamentimi ilaasortaasut maanna 24-upput. Inatsisartuni ilaasortat 4,4 procentii arnaapput, qinersisoqareerpalli kisitsit taanna arfinillit aamma qulit akornanniinnissaa ilimagineqarpoq.

Arnat Tyrkiami inatsisartunut ilaasortanngorniassappata aqqusaagassat amerlaqaat, ajornaatsuinnaanatillu.

Tassa partiit assigiinngitsut qinigassanngortitaasa allattorsimaffiinut inissilluaqqaartariaqassapput, angutimmi allattorsimaffinni inissilluarneqartarput, salliutinniarneqartarmata.

Qineqqusaarnerit eqqaaneqanngitsoorsinnaanngillat. Ilami arnat isiginnaartitsisartut filmiliaritittartullu nuimasut ilaat umiisalerlutik qineqqusaartut takornartaasimanngillat:

- Inatsisartuni ilaasortanngorniaraanni umeqarneq pingaaruteqarpa, arnat qineqqusaarnerminni aperipput.

Akissullu ajoraluartumik tassaavoq: - Aap. Arnarli qinigaasussatut ilimagineqartoq, Canan Aritman, oqarpoq arnat amerlanerusut inatsisartunut ilaasortanngorsinnaanissaat kissaatiginaraluartoq:

- Demokratii arnartaqanngitsoq tassaavoq demokratii amigaatilik, Canan Aritman naqissusiivoq.