Arnat ilinniarfinni siuuttuunerat perorsagaanermik patsiseqarsorineqarpoq

Ilinniarfinni nangitseqqiffiusuni arnat amerlanerunerat, meeqqat atuarfianni Ilinniarnertuunngorniarfinnilu arnat angusarissaarnerunerannik niviarsiaqqallu perorsarneqarnerminni tulluarsarsinnaanerunerannik pissuteqarsinnaasoq, Ilisimatusarfimmi ilinniartup nalilerpaa: - Meeqqaat atuarfiini Ilinniarnertuunngorniarfinnilu arnat angusarissaarnerusarnerat ilaatigut patsisaasoraara, arnat ilinniarfinni ingerlaqqiffiusuni ingerlaqqittarnerannut. Perorsaariaaseq aamma nunatsinni atuuttoq pissutaaqataasinnaavoq, tassalu arnat tulluarsarsinnaanissaminnut piareersarneqartaramik assersuutigalugu illup iluani suliassatigut, nukappiaqqat attuinnginnissaat pingaartinneqarnerusarluni. Taamaalillutik nukappiaqqat ilinniartitaanikkut ingerlaqqinniarnerminni ajornakusoortitsinerusarlutik, Katti Frederiksen oqarpoq. Taassuma aamma oqaatigaa arnaannaallutik oqallisileraangamik suna tamaat angorusuttaramikku, angutitaqartuugunik killiliisinnaasumik pitsaassagaluartoq. Katti Frederiksenip oqaasilerineq, atuakkialerineq tusagassiuutilerinerlu Ilisimatusarfimmi ukioq siullermi ingerlappaa. Ilisimatusarfimmi ilinniartut 150-iusut amerlanersaat arnaapput.