Arnat I-69-imeersut arsaannermi pissartanngorput
Pissartanngorniutivinnermi I-69-ip B-67 1-0-imik ajugaaffigaa.
Ajuunneq isertinneqartutuaq, nikinneq sioqqutitsiarlugu Bebiane V. Johnsenimit straffesparkimi isertinneqarpoq.
Bronzinnanniunnermi Qeqertarsuarmiut arnartaat Disko 76-imeersut, Upernavimmiunut UB-83-imut 1-0-imik ajugaapput.
Aggustip 16-ianni angutit inersimasut pissartanngorniunnerat Nuummi aallartissaaq, sinerissamilu pissartanngorniunnissamut anngunniunnerit ingerlanneqaleruttorlutik.
Kujataaniit annguttut tassaapput Narsamiit N-85 aamma Qaqortumiit K-33. Qeqqani Nûk pissartanngorniunnermik aaqqissuisutut peqataanissamut qulakkeerinnereerput, qeqqaniillu peqataasussat aappaat sapaatip akunnerata matuma naanerani paasinarsissaaq.
Qeqertarsuup Tunuaniit holdit marluk pissartanngorniunnermut peqataassapput, soorluttaaq Avannaaniit holdit marluk aamma annguttussaasut.
Arsaattartut kattuffianni siulittaasup qanittukkut nalunaarutigaa, avannaanit peqataasussat arlaat peqataasinnaajunnaassagaluarpat, Nunatta qeqqanit annguttussat marlunngortinneqarumaartut.