Arnat EU-mi pissaaneqarnerulernissaat piumasaraat

Nunat naalakkersuisui piffissaq kingulleq atorlugu isummaminnik apuussiffiginiarsaraat.

EU-mi præsidentiusussamik aamma EU-mi nunanut allanut ministeriusussamik toqqaanissaq aqagu oqaluuserineqassaaq.Qullersatullu atorfinnut marluusunut inuttalerneqartussanut arnat amerlagisassaanngitsut piukkunneqarput.

EU-p inatsisartuinut ilaasortat inuusunnersaat Bruxellesip aqquserngini uitsatigineqarpoq. Kakkivissamigut umerujussarnik imminut qalipappoq.

Tassami EU-mi qullersatut atorfininniaraanni taakku atorfissaqarput, pingitsoornanimi angutaanissaq pisariaqarpoq, taanna oqarpoq.

25-nik ukiulik Emilie Turunen SF-imeersoq arnallu allat illorsuup qullersatut atorfiit pillugit ataatsimiiffiusussap saavani akerliussutsimik takutitsipput. Tassani EU-p præsidentissaa aamma nunanut allanut ministerissaa toqqarneqartussaapput.

Partiimut sorlermut ilaasortaaneq apeqqutaatinnagu arnat EU-p inatsisartuinut ilaasortat qasungaartunik qilernilerusalersimallutik aamma anguterpalunniavillutik kiisalu arnaneersunit suliffissarsiortutut qinnuteqaatilisarlutik aggiasimapput, aamma Socialdemokratineersoq Britta Thomsen.

Isumaqatigiissut, naligiisitsinissamik imaqartoq akuersissutigeqqammeritsik, inatsisiliortarnerlu aamma pingaartitat naligiisitsinermit tunngaveqartinneqartartut, taassuma oqaatigaa.

Arnat qullersatut atorfiit inuttalerniarneqarneranni puigorneqassappata, kommissionip nutaanik inuttalersorneqarnissaanut akerliullutik taasinissamik taakku siooraasaaripput.