Arnat Danmarkimiittut eqqumaffigeqquneqarput

Kalaallit arnat Danmarkimut pitsaanerusumik inuuneqarniarlutik aallartarput, taakkuali amerlanersaat mattuttarput. Taama peqatigiiffik Kalaallit Meerartaat naliliivoq, arnat meeraasalu ulluinnarni inuunerannik oqinnerulersitsiniarluni misiliutigalugu suliniuteqareerluni.

Arnat Danmarkimut nuukkaangamik suliffittaarniarnertik, initaarniarnertillu ajornakusoortittarpaat kiisalu inunnik attaveqarfigisinnaasaminnik amigaateqalertarput. Tamannalu ilaqutariit tamarmik malugisarpaat, Bente With peqatigiiffiup allattaanera oqarpoq.

-Meeqqat atuarfimmi angusarissarlutillu malinnaalluaraluarlutik angerlarsimaffimminni angajoqqaaminnik maligassiuilluartunik malitassaqanngikkunik namminneq inersimasunngornerminni ilinniarnissartik suliffittaarnissartilluunniit ajornartorsiutigilersinnaavaat. Angajoqqaat suliffeqannginnerisa kingunerisaanik inuit attaveqarfigisartakkat amigaataasarput taamaalillunilu meeqqap inuttut ineriartornermini aamma tamakkua amigaatigilertarpai.

Bente With aamma oqarpoq, arnat inunnik attaveqarfigisartagassaannik pilersitsiniarlutik eqqarsarlutik,.

-Aamma nunap immikkoortuini oqaloqatiginnittarfinnik pilersitserusuppugut, arnallu sullissisui, politiit ikiortigalugit ilinniarteqqikkusuppagut.

Tamakkualu saniatigut ilaqutariit attaveqaatitut atorneqartartut aallartereerpagut. Arnat ajornartoorluinnarnerini taakku sullissisunut attaveqarsinnaapput taamaalillutillu ikiuussinnaallutik. Aamma arlaatigut katersuunnissamik aaqqissuusseqataasinnaalluarput taamaalillutillu arnat mattunnissaralui pinngitsoortissinnaallugit. Kiisalu ilaqutariit attaveqaataasartut meeqqanik paarsisinnaapput oqilisaasseqataallutillu.