Arnat bikinillit oqallitsitsinissamut iluaqutiginiarneqarput

Bikiniinnaalluni apussarissumi. Atuagassiap Canadami Yellowknifeminngaaneersup, Up Here-p, saqqaani asseq taanna takuneqarsinnaavoq.
juulip 08-at 2010 13:41

Nunarsuarmi silap kiatsikkiartornerata oqallisigineqarnerulernissaa siunertaralugu arnat bikinillit atuagassiami atorneqartut, nittartakkami toronto.comimi atuarneqarsinnaavoq.

Arnat bikinillit katillugit qulit atuagassiamiipput, tamarmillu silami assilineqarsimallutik - ilaat Yukonimi ilaallu Nordvest Territoriami.

Atuagassiap aaqqissuisua, Aaron Spitzer, oqarpoq, atuagassiap timersornermik allaaserisaqartartup, Sports Illustratedip najoqqutarisartagaa allanngortilaarlugu atorsimagitsik.

- Nunarsuarmi silap kiatsikkiartornera assini takutinniarparput, aaqqissuisoq oqarpoq, nangillunilu:

- Silap pissusaata allanngoriartornera Issittumi oqaluuserineqarnerpaagunarpoq, nunarsuarmilu sammineqarnerpaalluni.

Silap pissusaata allanngoriartornera taama sukkatigiuassappat, Issittumi nunap isikkua allanngorujussuartussaavoq.

- Kiatserujussuartussaavoq, bikinillu atugaallualissagunarput, Aaron Spitzer oqarpoq.