Arnat assammik arsartartut Mexico ajugaaffigaat
Nunarput taamaalilluni gruppe B-mi normu 5-inngornissani qanilliallappaa, VM-imullu anngunniunnissamut peqataanissaminut suli periarfissaqarluni.
Nunanut allanut unammisartut sungiusaasuat unammisartoqatigiit takutitsilluarnerat nuannaarutigaa.
- Nivissat taama kusanartigisumik takutitsinerat nuannersupilussuuvoq. Angutinut normu 5-inngortunut nallersuussinnaallutik uppernarsarpaat. VM-imulli Danmarkimi decembarimi ingerlanneqartussamut peqataaniassagutta aqagu ajugaasariaqarpugut, nunanut allanut unammisartut sungiusaasuat ippassaq taama oqarpoq.
Unammisartut nunatsinneersut aallartinnerlukkaluarput målinik pingasunik kingualertupallallutik. Sukataarnermikkulli - minngerunngitsumik Mia Rasmussenip saassussisarnermigut ajuutsitsinaveersaartullu takutitsilluarnerisigut siuariartulerput.
Unamminerup immikkoortuani siullermu aallartinnerlunneq immikkoortup aappaata aallartinnerani nangeqqippoq unammisartuvullu kinguaqqillutik - tamatumuuna målinik sisamanik. Aamma periarfissat arlallit iluatsinngitsoorpaat.
Nunanut allanut unammisartut sungiusaasuat timeoutertitsivoq, tamatumalu kingorna unammineq siumut-saariaasarpoq. Måliniittup Rina Møller Lorentzenip straffekastit pingasut annaappai Anja Heilmannilu unamminerup immikkoortuata aappaani arfinileriarluni isertitsivoq.
Unammisartuvut unamminerup minutsiini kingullerni 15-ini unammilluarput 19-17-inillu ajugaallutik.
- Kalaallit arnartaasa nunani tamalaani ukiuni 13-ini unamminernut peqataasimanatik pitsaanerit arfinillit akornanniinnerat angusaavoq kusanartoq. Nivissat unammilluarnerinut anguniagarusussuseqarnerinullu nersortariaqarpugut. Maani maluginiarneqaqaagut, nunanut allanut unammisartut sungiusaasuat nuannaaqaluni Radioaviisimut SMS-ikkut taama allappoq.
Nunatta unammisartui Uruguaymut aqagu unamminerminni ajugaassagunik normu 5-inngorsinnaapput.