Arnat arsaattartut suli periarfissaqarput
Arnat arsaattartut siullermik unamminermi Isle of Manimut 1-3-mik ajorsarput. Ualimut Gibraltarimut unamminnermi pinngitsoratik ajugaasariaqarput semifinalep angunissaanut periarfissaqassagunik.
- Arlalitsigut tupaallatsitsisoqarami ullumilu angusat apeqqutaallutik suli ingerlaqqinnissamut periarfissaqarpugut, kalaallit sungiusaasuat Bent Petersen taama KNR-imut oqarpoq
Angutit arsaattartut ingerlaqqissinnaajunnaarput ippassaq Menorcamut 2-3-mik ajorsarnermik kingorna. Ullumi siornatigut Island Gamesimi pissartaasimasut Jersey unammissavaat.
Sulorartartut
Sulorarnermi nunanut allanut unammisartut Island Gamesimi holdikkaarluni unamminermi normu 4-nngorput taamalu ujaminnagatik. Bronzennanniunnermi kalaallit ajorsarfigaat Savalimmiormiut 0-3-mik ajorsarfigalugit. Ataasiakkaarnermi Sara Lindskov Jacobsen aamma Bror Madsen sætimi siullermi ajugaasaraluarput sæt-illi kingulliit marluk ajorsartarlutik.
Angutit iligiiaarneranni Bror Madsen aamma Mads Nyvold aamma ajorsarput.
Angutit volleyballertartut ukiormanna Island Gameseqarnerani siullermeerlutik ippassaq ajugaapput Jersey sætini 3-2-mik ajugaaffigalugu ualimullu unammissavaat Isle of Wight siullermik unamminerminni Jersey-mut ajorsartut.
Arnat volleyballertartut siullermeerlutik ippassaq aamma ajugaapput Guernsey 3-0-mik ajugaaffigigamikku. Ualimut unammissavaat Jersey unamminerni aallarniutaasuni suli maannamut ajugaanngitsut.
Nerrivimmi arsaarartartut holdikkaarnermi normu 9-10-nngorniuttussanngorput. Ukiut marluk matuma siorna kalaallit holdikkaarnermi bronzennakkaluarput ukiormannali makitsisoqarnerani puljemut sakkortuumut inissillutik.