Arnat arsaattartut semifinalemut anngupput
Isaatitsisoqangaatsiarpoq kalaallit arnartaat Gibraltarimut 8-0-mik ajugaammata. Kalaallit taamaasillutik puljeni tamani normu 2-nngortuni isertitsinersaallutik semifinalemut anngupput.
Arsaanneq naammassisoq kalaallit arnartaasa pissangaqalutik utaqqivaat unamminerni allani qanoq angusaqarsimanersut, tassa målit isertinneqartut apeqqutaammata kikkut ingerlaqqinnissaannut. Semifinalemi kalaallit sisamanngornermi unammisassaat imaannaanngillat. Tassaapput kingullermik Island Gamesim ajugaasut Åland. Taamaattoq tassa kalaallit qulakkeerpaat ujaminnanniunnissartik.
Kalaallini isertitsisuupput Arnaq Borup Egede pingasoraartoq. Berthe Ugpernángitsok marloraarpoq kiisalu ataaseraarlutik Manumina Reimer, Aviana Reimer aamma Bebiane V. Johnsen.
Angutit arsaattartut unamminerni aallarniutaasuni unamminermi kingullermi Jersey-mut 1-2-mik ajorsarput taamaasillutillu normu 9-10-nngorniuttussanngorlutik. Kalaallini isertitsisuuvoq Norsaq Lund Mathæussen.
Sulorartartoq Bror Madsen angutit ataasiakkaarneranni finalemut annguppoq semifinalemi pissanganaqisumi Savalimmiormioq Aksel Poulsen ajugaaffigereerlugu. Finalemi unammisussanngorpaa Josh Green Isle of Man-imeersoq. Holdikkaarluni unamminermi taakku imminnut unammereerput tassanilu tuluk ajugaavoq.
Angutit volleyballertartut ippassaq Isle of Wight ajugaaffigaat ullumilu Åland unammissallugu. Arnat volleyballertartut ajugaaffigaat Jersey ullumilu Rhodos unammissallugu.
