Arnat arlaqartut inatsisartunut ilaasortanngorput
Taakku akornanni kiinnat nutaat tassaapput Mimi Karlsen, Naja Nathanielsen, Akitsunnguaq Olsen minnerunngitsumillu Maliina Abelsen. Taanna 1410-nit qinerneqarluni inatsisartunut ilaasortanngorpoq.
- Arnat qinigaasut taama amerlatiginerat tupaallannaaq, taamaattoqarneralu ajunngilluinnarpoq. Arnarnik qinersineq arnanut tatiginninnermik takutitsivoq, tamannalu tamanut nuannaarutaasoq ilimagaara, Maliina Abelsen oqarpoq.
Taanna partiimini kisiartaalluni qinerluarneqartutuaanngilaq. Juliane Henningsen inatsisartunut qinersinermut kingullermut sanilliullugu tallimariaammik maanna qinerneqarpoq.
Maliina Abelsenip arnat inatsisartunut taama qinerluarneqarsimanerat arlariinnik pissuteqarnerarpaa.
- Isumaqarpunga politikkikkut ingerlatsinitsinni arnat angutillu naligiinnerusumik saqquminerat innuttaasunit takuneqarsimasoq, pisariaqartinneqartorlu paasineqarluni. Tamanna innuttaasunut nutaamik eqqarsalersitsisimassaaq, isumaqarpungalu tamanna kusanarluinnartoq, Maliina Abelsen oqarpoq.
Taamatuttaaq arnat politikkerit nuimasut nukittuut sunneeqataasimanerarpai, taamaasillutik arnat amerlanerusut politikkikkut sulinissaminnut upperinerulersimassangatillugit.
- Oqarsinnaalerpugut 'aap uagut aamma arnatut politikkikkut suliaqarsinnaavugut', Maliina Abelsen naggasiivoq.
Taamatuttaaq Siumumeersoq Aleqa Hammond qineqqusaarnermi arnani taaguunneqarnerpaaq, qinersinermut kingullermut sanilliullugu pingasoriaammik qinerneqarami, tassa 1488-init taaneqarami.
- Takutippaa politikkikkut sassaqqaarninnit 2005-iminngaanniit maannakkumut sulinera iluarisimaarneqarluni amerlanerusunillu maluginiarneqarsimalluni, taaguuneqarluarsimanermik takussutissaavoq.
Taaguuneqarluarsimanera suleriarnissannut atorluassavakka. Inuiaqatigiit amerlanerusut uannut isiginninnerat tassuuna takussutissaavoq. Anguniakkakka qineqqusaarutigisakkalu maluginiarneqarlutik pingaartinneqarlutillu isiginiarneqarsimaneri namminerisami siunissami sakkussanni pingaarnerpaavoq. Aamma Siumut tunngaviusumik anguniagai uanninngaanniit saqqummiunneqarsimaneri iluarisimaarneqarsimammat taanna sorsuutigissavara, Aleqa Hammond oqarpoq.
