Arnat angutinit imigassamik sunnertianerupput

Arnat angutinit imigassamik sunnertianerusarput.

Aamma imerpallaarunik tingumminnik eqittoornermik ineriartortitsisinnaanerat angutinit ilimanaateqarnerusarpoq.

Svenskit misissuinerata nutaap tamanna ersersippaa.

Tinguk aaqqinneqarsinnaanngitsunik ilungersunartunik ajoquserneqarsinnaavoq, viinnisorpallaaraanni baajatorpallaaraanni kimittuunillu imigassartorpallaaraanni.

Taamaattorli arnat angutinit imigassartorpallaarnikkut sunnerneqarnerusartut, Sverigemi Stockholmimi Karolinska Institut-imi misissuinerup nutaap ersersippaa.

Imerajuttut imigassarlu pissutigalugu tingummikkut ajoquteqalersimasut, allanit annerusumik stoffinik akiuussutissanik manniup qaqortortaata akuisut ittunik pilersitsisarput taakkualu akiuussutissat imigassaq nungusartarpaat taamatullu nungusaaneq tinguup eqikkiartorneranik pilersitsisartoq, misissuisut isumaqarput.

- Tamanna soqutiginaqaaq, taama oqarpoq Hvidovremi nakorsaaneq imigassamik ajornartorsiutilinnik katsorsaanermik suliaqartoq. Nappaatit imigassamik atuinerup pilersissinnaasaasa assigiinngitsunik sunniuteqartarnerannut patsisaasut paasisaqarfiginerat soqutiginarpoq, nakorsaaneq oqarpoq.

- Arnat angutinit imigassamit patsiseqartumik tingummikkut eqittoorsinnaanerisa annerunera nutaarsiassaanngikkaluarpoq. Tamatumunnga patsisaavoq nalinginnaasumik arnat angutinit timikinnerusarnerat.

Nakorsaanerup innersuussutigaa Danmarkimi peqqissutsimut qullersaqarfiup innersuussutai

malinneqartariaqartut, tassa sapaatip akunneranut angutit amerlanerpaamik 21-nik arnallu 14-inik ataasinnguartorsinnaassasut aamma ullormut tallimat sinnerlugit imernaveersaartariaqartoq.