Arnat angutinit ikinnerungaatsiartut
Pisortaqarfinni pisortatut atorfillit arnat angutillu agguataaraanni, arnat angutinit ikinnerungaatsiarput.
Pisortaqarfinni 14-usuni taamaallat arnat sisamat pisortatut atorfeqarput.
Arnat naalakkersuinermi suliaqartut aamma angutinit ikinnerupput. Naalakkersuisuni arfineq-pingasuusuni taamaallaat arnat marluk naalakkersuisuupput.
Namminersornerullutik Oqartussani sulisut arnanut angutinullu agguataaraanni arnat amerlanerussuteqalaarput.
Pisortaqarfinni sulisut allattorsimaffiini takuneqarsinnaavoq, sulisut 55 procentii arnaasut.
Pisortaqarfinnili ataasiakkaani angutit arnallu amerlaqatigiinngillat. Assersuutigalugu Ineqarnermut Attaveqaateqarnermullu pisortaqarfimmi sulisunit marloriaatingajaat angutaapput.
Akerlianilli Allaffissornermut pisortaqarfimmi, Peqqissutsimut pisortaqarfimmi, Naalakkersuisullu allaffeqarfiani ingammillu Ilaqutariinnermut pisortaqarfimmi arnat amerlanerussuteqangaatsiarput. Taakkunani sulisut pingajoraarterutaat sinnerlugit arnaapput.
