Arnat angutillu isertitsivinni ineqatigiissittarnerat isoraa

Manfred Nowakip ilaatigut arnat angummik pinngitsaaliisimasumik ineqateqartillugit paarnaarunneqarsimasut, paarnaarussaasimanerullu kinguneranik qasusooqqajaaneq, kiisalu angerlarsimaffinni persuttaasarnerup eqqumaffigineqarpallaannginnera isornartutut isigai.

Nowakilli Kalaallit Nunaat, Danmarkisuulli naalliutsitsisarnerup akiorneqarneranut allanut sanilliullugu iliuuseqarnerusartoq oqaatigaa.

Manfred Nowak Nuummiinnini alutornartutut isigaa, oqaluttuarlunilu nunanut assigiinngitsunut angalanermini Kalaallit Nunaat Danmarkilu kisimik naalliutsitsinernik sakkortuumillu persuttaasarnernik nalunaarfiusarsimanngitsut.

Nuummiinninili alutorigaluarlugu assigiinngitsut isornartorsiorpai.

Nowakip ilaatigut isornartorsiorpaa Pinerlussimasunut isertitisarfimmi arnat marluk apereqqaarnagit angummik pinngitsaaliisimasumik ineqateqartinneqarsimanerat, kiisalu arnap ataatsip mattusimaneqarnermi kingorna qasusooqqajaalersimammat, Nowakili oqarpoq inuit pisinnaatitaaffii unioqqutinneqaqqajarsimanngitsut.

Nowakilli isorinerpaasaasa ilagaat angerlarsimaffinni persuttaasarnerit eqqumaffigineqarpallaannginnerat.

- Angerlarsimaffinni persuttaasarneq Kalaallit Nunaanni ajornartorsiutaavoq sammineqarpianngitsoq. Tamanna akiorniarlugu eqqartuussisutigut malersuineq minnerunngitsumillu pinaveersaartitsineq sammineqarnerusariaqarput.

Nowakip aamma CIA-p nunatsinnut mittarsimaneri pillugit qulaajaaniarnermi ikiuukkusuppoq, nunatsinnilu pisortat suleqatikkuminarnerarlugit.

Manfred Nowak oqarpoq imaassinnaasoq tikeraaqqissalluni.