Arnat angerlarsimaffeqanngitsut unnuisarfiliorneqalerput

Københavnimi ullumikkut unnuisarfiit angutaannangajannit najugarineqarput atukkallu sakkortusinnaallutik, arnanit amerlanertigut toqqissisimananngitsut. Taamaattumik arnat taakkua oqqiffissarsiortariaqartarput angutinillu assigiinngitsunik angerlaassisarlutik, taamaalillutillu kinguaassiuutitigut atornerlunneqarnissaminnut ulorianartorsiortarlutik. Tamanna ajornartorsiutaavoq ilaatigut aammattaaq kalaallinut arnanut arlalissuarnut atuuttoq, taama oqaluttuarpoq Københavnip kommuniani inunnut atugarliortunut siunnersorti Tina Wils.

- Kalaallit arnat arlalippaalussuit ikinngutiminni ilisarisimasaminnilu nalaasaarfinni sinngumasartut naluneqannginnguatsiarpoq. Taakkua inuttut ilisarisimasaasa ilaat ineqarsinnaapput, taamalu iseqqusisarlutik unnueqqusillutillu, immaqa ilaanni arnat pitsaavallaanngitsumik akiliisinneqartaraluartut. Aamma imaassinnaavoq ilaat imerniartarfimmersuusartut, taavalu arnanut taakkununnga angerlaqateqarnissaq unnuiffissarlu ajornannginnerusarluni, aqqusinermi unnuisarfimmiluunniit toqqissimanannginnerusumiilluni sininnissamut taarsiullugu, Tina Wils oqarpoq.

Arnat iserfissaqarnissaasa saniatigut unnuisarfik aammattaaq toqqissisimanartumik angerlarsimaffiussaaq, tassanilu kommunip arnat angerlarsimaffeqanngitsut attaveqarfigisinnaallugit aallaallu immaqa ikiorsinnaallugit.

- Tassa siullermik pingaarnerpaamillu tassaassaaq taakkua sinittarfissaat toqqissisimasutullu misigisaqarfissaat allanut innersuunneqaratik. Aammattaaq soorunami inissisimasartut allat eqqarsaatigineqartariaqarput, katsorsaataasinnaasullu arlallit periarfissaraavut atornerluineq ilaatinneqarsimagaangat, aammalu periarfissaqarluni inunnik isumaginnittoqarfik aqqutigalugu inissamik innersuussinissamut, tamatumunnga piumasaqaataasut naammassineqarsimappata. Tassa maannakkut suleriaaserput iluaqutigalugu ikiorusuppavut, Tina Wils naggasiivoq.

Suut tamarmik pilersaarutit malillugit ingerlappata unnuisarfik nutaaq aappaagu ammarneqassaaq.