Arnat angerlarsimaffeqanngitsut Nunavumi amerliartorput
Angerlarsimaffinni persuttaasarnerit, suliffissaaleqineq napparsimasarnerillu. Nunavumi arnat angerlarsimaffeqanngittarnerinut ajornartorsiuteqartarnerannullu tamakku ilaatigut pissutaagajuttarput.
Arnat illoqarfinneerlutillu nunaqafinneersut 70-it Nunatsiaq News-imit apersorneqarsimapput nalunaarusiortoqarsimallunilu.
Nalunaarusiaq ”Little voices of Nunavut”-imik atserneqarsimavoq, Nunavummiullu arnartaasa ajornartorsiutaasa ilaat nalunaarusiami taakkartorneqarput.
Inissiani tattoqisaattoqarnera, arnanik persuttaasarnerit, imigassamik ajornartorsiuteqarnerit pissakitsuunerlu ajornartorsiutinut ilaapput.
Arnap aappani qimakkaangamiuk angerlarsimaffeqanngitsutut inuulersarpoq, ilaquttaminilu unnuisariaqartarluni, taamaanngippallu angummiit angummut nuuttaqattaartariaqartarluni.
- Asanninngikkaluarluniluunniit nuannarinninngikkaluarluguluunniit angut ingerlaqatigineqartarpoq, taamaaliornikkut unnuiffissarsisoqartarluni, arnaq angerlarsimaffeqanngitsoq apersorneqartilluni oqarpoq.
Qimarnguimmullu inissinneqarnissani siunertariinnarlugu persuttarneqarnissani ilaatigut kissaatgiinnartarsinnaanerarlugu.
Kristumiut peqatigiiffiata YWCA-p assingusumik misissuisimanerata kingunerissanik Nunatsiaq News misissuisimavoq, arnat Northwest Territoriesimiittut, Yukonimiittut Nunavummiittullu apersorneqarsimagamik.