Arnat amerlanerit timersortalertariaqarput

Issittormiut marsip qaammataani unammiuaarnissaanni arnat amerlanerit peqataatinniarneqarput. Arnat angutillu amerlaqatigiissinniarlugit arsamik unammisussat arnat hold-imik ataatsimik ilaneqarnialerput. Ungasinnerusoq eqqarsaatigalugu arnat timersornerulernissaat anguniarneqassaaq.

Kingullermik Issittormiut Unammiuaarneranni sisoraatinik oqilaniunnerni nukappiaqqat niviarsiaqqallu peqataatinneqarput. Maannakkulli unammisoqalernerani meeqqat aqqaneq-marlunnik 13-inillu ukiullit misilittagakinneri pissutigalugit peqataatinniarneqanngillat.

Taamaalinerani allat peqataanissaminnut periarfissaqalissapput.

Nunatsinni Timersoqatigiit Kattuffianni allattaanerup Jens Brinch-ip arnat angutillu sapinngisamik amerlaqatigiisillugit peqataanissaat siunniunnerarpaa, arnallu 17-iniit 19-inut ukiullit arsamik unammisussat peqataasussanngorput.

-Arnat arsaannermik soqutigisaqarnerulernissaat siunertarajugu taamaliorpugut. Ilisimavarpummi arnat angutininngarnit timersorunnaajaarnerusartut, Timersoqatigiit Kattuffianni allattaaneq Jens Brinch nassuiaavoq.

Qeqertarmiut 2007-imi Rhodos-imi unammisaqattaalerpata arnat arsaallutik unammeqataanissannik Timersoqatigiit Kattuffiat neqerooruteqarportaaq.