Arnat akuttat angutit pilerigineruvaat

Arnat qaamasunik nujallit angutinit pilerigineqarnerusartut ilisimatuussutsikkut misissuinerit paasinarsisissimavaat. Pingaartumik isumaqaraanni angutini tamani qaarusummiutut pissusilersortarneq nalinginnaasuusoq – Danmarkimi ministeriuneq Anders Fogh Rasmussen kisimi taama isumaqassanngimmat.

Nutaarsiassaqartitsivik Ritzau taama allappoq.

Tuluit Nunaanni aviisimi, The Independentimi, allassimavoq, atuagassiami, Evolution and Human Behaviourimi, ilisimatuussutsimut tunngasumik ilanngutassiisoqarsimasoq, Europap avannarpasissuani arnat, angutinit malugineqarnerunissartik anguniarlugu, ukiut tuusintillit matuma siorna, ukiup qanoq-ilinera naapertorlugu, isikkortik allanngortikkiartuaartarsimagaat, soorlu sikuernerata missaani, qaamasunik nujaqaleriartorsimapput tungujortunillu iseqaleriartorlutik, tassagooq angutit arnanut taartunik nujalinnut pilerisunnerat ingalassimaartinniarlugu. Tamannalu iluatsilluarsimavoq. Taama pisoqarnera pikkunarsimaqaaq, angutimmi taamanikkut ussippaarsuarnik, tuttunik kiliffannillu piniartariaqarput, amerlasuullu inuunertik annaasarlugu. Taamaammat angutit taamanersuaq ikinnerussuteqarsimapput, arnallu angutissarsiornerminni, uissarsiornerminni meeqqaminnillu ataatassarsiuinerminni imminnut unammingaatsiartariaqartarsimallutik.