Arnat ajornartorsiortut ikiorserniarlugit filmiliortoqarpoq

Arnat ajornartorsiortut Danmarkimi ikioqqullutik saaffiginnittartut affaat nunasisuusarput.

Filmit iluaqutsiullugit – aamma uatsinnit peqataaaffigineqartumik – taakku maanna ikiorsiiviginiarneqalerput.

Danmarkimi arnat nunasisut, qallunaatut oqallorlunnertik pissutigalugu, ajornartorsiutiminnik sukumiisumik oqaluttuarsinnaasannginnamik ikiugassarpassuanngorsimapput. Inuttulluunniit pisinnaatitaaffitik suunersut ilisimasarsimanngilaat, pingaartumik angerlarsimaffinni persuttaasoqarsimatillugu saaffiginniffigisinnaasaminnik ilisimatinneqartarsimanngilluinnarput.

Arnalli nalaataqarnerliortut saaffiginniffigisinnaasaannik ilitsersuutinik tallimanik Danmarkimi nunasisut isumagineqartarfia filmiliortitsivoq.

Persuttarneqartarnerni arnat oqartussaasunut nalunaaruteqartarnissaasa pingaarutaa filmit oqariartuutigaat.

Filmiliat tallimaasut minutsit tallimat qulillu akornini sivisussusillit arnat ajornartorsiortut ukununnga saaffiginnissinnaasut oqariartuutigaat:

Politiinut, kommuninut, arnat ajornartorsiortut saaffiginnittarfiinut, eqqartuussissuserisunut, naalagaaffiullu nunaannarmi oqartussaaffeqarfigisaasa immikkoortuinut.

Paasisitsiniaanermili arnat eqqorneqartut qanoq iliornissaannik paasisitsiniaaneq ajornaatsuinnaanngitsoq, Danmarkimi nunasisunut ministeri Rikke Hvilshøj nassuerpoq.