Assi: European Parliament/Pietro Naj-Oleari

Qulaarpaa Arnat aapparisaminnit persuttarneqarnerpaasarput

Arnat ilaat ullut tamaasa aapparminnit persuttarneqartarput. Tamannalu nunatsinni ajornartorsiutit annerpaartaasa ilagaat.

Arnat katillugit 232-it ukioq kingulleq qimarnguinut saaffiginnissimapput. Tassa imaappoq arnat pingasuugaangata marluk aapparminiit qimangusarsimapput. Taakkunani meeqqat 200-it missaaniittut qimarngoqataasimapput.

Kisitsisillu isigissagaanni inuttussuseq aallaavigalugu Danmarkimut sanilliullugit marloriaammik amerlanerupput.  

Nunattalu illoqarfiisa annersaata tullia, Sisimiut, qimarngueqanngilaq. Taamaattumik arnat aapparminiit qimaanissaminnut periarfissaqarpallaanngillat. Qimarnguinullu qimaasartut aapparminiit persuttarneqasimasuunerusarput.

Innuttaasunik missuinermi 2010-meersumi arnat kalaallit inersimasut 62%-ii persuttagaallutik misigereerpaat. Taakkulu aapparminiit aappakuminiilluunniit persuttagaasarsimapput.

Timikkulli persuttaasoqaannarneq ajorpoq, tarnikkummi aamma persuttaasoqartarmat.

Arnallu ilaasa naleqanngitsutut misigitinneqartarput, taamaalilluni imminut naleqartinnerat innarlerneqartarluni. Taamaalisoqaraangallu arnat aapparminik qimassinissartik ajornakusoortilertarpaat.

Politiillu kisitsisaataasa takutippaat nunatsinni arnat persuttaanermi eqqugaanerpaasartut. Nuummi arnat 155-it ukioq kingulleq persuttarneqarsimapput. Angutillu 55-it persuttarneqarsimallutik. Nunanilu allani angutit persuttaneqarnerpaasartut paasisat takutippaat. Persuttaanerillu pingasuugaangata marluk angerlarsimaffinni pisarput.

Arnaavit aapparisanniillu persuttarneqartarsimallutit? Imaluunniit angutaavit persuttaasarsimallutillu? Qanoq ingerlariaqqippit?

Apersorsinnaasatsinnik ujarlerpugut. Uku saaffigineqarsinnaapput:

Dorthea Johansen doj@knr.gl imaluunniit Walter Turnowsky wtu@knr.gl

Isummersuutit


 

Pages