Arnarulunnguaq ataqqiniarneqassaaq
Ullumikkut ulloq marsip ulluisa arfineq-pingajuat tassaavoq Arnat Ulluat. Arnarulunnguaq, Knud Rasmussenip inuit nunaannik kaajallaaniaalulluni qimussimik angalanersuani angalaqataasoq, pillugu, atuakkiassamut eqqaassutissamullu aningaasanik arnat pingasut katersinerat pimoorullugu ulluni makkunani aallartippoq.
marsip 08-at 2008 13:21
Arnat taakku pingasut tassaapput Karo Thomsen Fleischer, Tukummeq Qaavigaq aamma Asii Chemnitz Narup, aningaasaateqarfiup siunertaraa, Arnarulunnguaq pillugu eqqaassutissiornissamut atuakkiornissamullu aningaasanik katersinissaq.
-Oqaluttuarisaanermi tamatumani arnap akuunera maannamut nipaatsumik atorneqarsimasoq naqissuserusupparput, Asii Chemnitz Narup oqarpoq. Arnarulunnguaq Innaanganermi 1893-ip missaani inunngorpoq, toqullunilu oktoobarip ulluisa aappaanni 1933.
Eqqumiitsuliortoq nunani tamani nersugaasoq, Aka Høegh, eqqaassutissaliussaaq, atuakkiornissamullu atortussanik katersineq ingerlallualeersoq, aningaasaateqarfiup siulersuisui tusagassiutitigut nalunaaruteqarput.
