Arnarulunnguaq ataqqinaaserniarpaat
Arnat Ulluat eqqorlugu Kalaallit Nunaata oqaluttuarisaaneranut pingaaruteqaqisumik arnamik ataqqinaasiisoqarniarpoq.
Ataqqinaaserniarneqartoq tassaavoq Arnarulunnguaq, Knud Rasmussenip 1921-miit 1924-p tungaanut Inuit nunaannik Kaajallaanialunnerata nalaani ikiuilluarsimasoq.
Tamanna pissutigalugu Arnarulunnguamut eqqaassutissiortoqarnissaa anguniarlugu aningaasanik katersineq ullumi aallartissaaq.
Aningaasanik katersinissamik sulissutiginnittut tassaapput Asii Chemnitz Narup, Karo Thomsen, kiisalu Tukummeq Qaavigaq.
Inuit nunaannik Kaajallaanialunnermi Arnarulunnguaq igasuullunilu amminik atisalerisuuvoq, issumillu ujaqqamillu qarmarlugit illuliorneq nalorsaatigisimanngivillugu.
Arnaq taanna Qaanaarmiu sapiitsuunini pikkorissuuninilu Danmarkimit Fortjenstmedaljemik saqqarmiulerneqasimavoq, sulili nunatsinnit nersornaaserneqarsimanani.
- Taamaattumik Arnarulunnguaq pillugu eqqaassutissiortoqarlunilu atuakkiortoqartariaqaraluarpoq, sulissutiginniartut tusagassiutinut allagaqaateqarnerminni allapput.
Suliffeqarfik imminut pigisoq ”Arnarulunnguaq” pilersillugu katersuiniartoqassaaq, komitélu arfineq-marluk qulingiluallu akornanni ilaasortaqartussamik pilersinneqassalluni.
