Arnarrooqataassavit?
Ulloq taanna malunnartinniarlugu Sisimiuni Arnat Ulluata kommite-a "Ukioq manna arnatsialammik" toqqaaniarpoq.
- Kikkulluunniit toqqarneqarnissaannik innersuussisoqarsinnaavoq, utoqqaaguni inuusuttuuguniluunniit, ilisarisimaneqaruni ilisarisimaneqanngikkaluaruniluunniit assigiippoq, Kulturikkut Illorsuaq Taseralik aamma 8. marts kommite sinnerlugu, Arnajaraq Støvlbæk oqarpoq.
Innersuunneqartup kinaanera allakkatigut imaluunniit email-ikkut Taseralimmut nassiunneqareersimassaaq kingusinnerpaamik ataasinngorpat ullaakkut.
Martsip arfineq pingajuanni arnatsialammik toqqaanermi nerersuaqatigiittoqassaaq, oqalugiartoqarluni aliikkusersuisoqassallunilu. Kikkut tamarmik isersinnaanngillat, taamaallaat arnat kisimik unnussiornermut peqataasinnaapput.