Arnarlunniutit qaqissigit - massakkut

Nipisanniarneq pillugu Namminersornerullutik Oqartussat nalunaarutaat nr. 13, 13. maj 2005-imeersumi § 7 naapertorlugu nipisanniarneq sapaatip-akunnerata ataatsip matuma siornatigut - juulip aallaaqqaataani unitsinneqarpoq. Taamaakkaluartoq sumiiffinni arlalinni suli qassutinik nivingatitsisoqarpoq.
Stenbiderrogn Assi © : Torben Larsen/KNR
Allattoq Najaaraq Egede
juulip 07-at 2011 15:33

Naalakkersuisoqarfiup ilisimatitsissutigissavaa ukioq manna nipisat suaannik tulaassuineq annertusingaatsiarsimammat, ukioq mannalu ukiut siuliinut sanilliullugu kiilumut akigitinneqartut qaffasinnerunerat nalunaarutigineqarmat, Aalisarnermut Naalakkersuisoqarfiup allakkani aallartippai.

- Taamaakkaluartoq Naalakkersuisoqarfiup ajuusaarutigalugu nalunaarutigissavaa piniarnermut aalisarnermullu nakkutilliisut takusarsimammassuk qassutit nipisanniutit amerlasuut suli qallorneqarsimanngitsut, naak nunatta kujasinnerusortaanni nipisanniarneq qangali unereeraluartoq.  Taamatut pisoqarnera aalisakkanut allanut puisinut timmissanullu ajoqutaavoq, oqarput.

Naalakkersuisoqarfiup aalisartut akisussaasut ilungersortumik maanna piumaffigai periarfissaq siulleq atorlugu qassutiminnik qallueqqullugit.  Taamaattoqanngippat qassutit, piginnittup imaluunniit angallatigisap ilisarnaataanik nalunaaqutserneqarsimanngitsut, igitassanngorlugit piniarnermut aalisarnermullu nakkutilliisunit qallorneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq