Arnarluit suaat tunisaalluarput

Nuummi aalisartut Royal Greenlandip Nuummi tunisaassiorfianut arnarluit suaat 134.855 kiilunik oqimaassusillit ulloq mannamut tunisimavaat, Atammimilu aalisartut 112.733 kiilu tunisimallugit, Møller Lyberth, Royal Greenlandip Nuummi ingerlatsinermut immikkoortortaqarfianeersoq ilisimatitsivoq.

Nunatsinni aalisartut arnarluit suaannik Royal Greenlandip tunitsiviinut 10-usunut tunisinnaanissaminnut marsip 20-aniilli periarfissaqalerput.

Royal Greenlandip tunitsiviutaani angisuuni arnarluit sualerisut 10-15-nik amerlassusseqarsinnaasarput, tunitsivinni mikinerusuni sulisut sisamanit arfinilinnut amerlassuseqarsinnaasarlutik.

Aalisartut arnarluit suaat nalinginnaasumik kiilumut 30 koruuninik pissarsissutigisarpaat, sumiffinni tunisassiorfinnik allanik unammillerteqarfiusuni kiilumut 33 koruuninik pissarsisarlutik.

Møller Lyberth oqaluttuarpoq aalisartut 270-it missaanniittut maannamut tunisisuusartut.

Nalinginnaasumik arnarluit suaat kujataani marsimi tunisaalersarput avannaani juunip naajartornerani tunisaajunnaartarlutik.