Arnaq toqutsisimasutut pasineqarluni ulluni 28-ni tigummigallagassanngortoq
Nuussuarmi inissiat ilaanni ataasinngornermi ullaakkut nalunaaqutaq 7.50 tigusarineqarpoq. Taanna nammineq napparsimmaveqarfimmut ambulancemik pissarsiorsimavoq.
Ikiuiartortut takkukkamik inissiami angut toqungasoq siumorpaat. Kingorna arnaq tigusarineqarpoq toqutsisimasutullu unnerluutigineqarluni. Arnaq eqqartuussivimmi marlunngornermi sassartinneqarmat, tassani politiit inassutaat tunngavigalugu ulluni 28-ni tigummigallagassanngortinneqarpoq.
AAMMA ATUARUK Nuummi arnaq toqutsisimasutut tigusarineqartoq
Politiit paasiniaanerat pissutigalugu arnaq matoqqasumik eqqartuuneqarpoq. Suliaq pillugu annertunerusumik paasissutissaqanngilaq.
Angut qaqugukkut toqusimanersoq politiit oqaaseqarfigerusunngilaat, sooq arnaq pasineqarnersoq, aammalu angut arnarlu qanoq imminnut attuumassuteqarsimanersut oqaaseqarfigerusunnagit.
AAMMA ATUARUK Angut aapparminut toqutsitut tigummigallarneqartoq