Politiit Arnaq Svendborgimi angerlarsimatilluni ikinngutiminit qiminneqartoq

Fynip Politiivi sapaatit akunnerini sisamani misissuereerlutik arnaq, kalaaleq 33-nik ukiulik ikinngumminiusimassasumit Svendborgimi najukkamini toqunneqarsimasoq oqaatigaat.

Fynip Politiivisa politikommissæriat, Jack Liedicke taama paasissutissiivoq.

- Qiminneqarpoq. Taakku marluullutik Svendborgimit ilisarisimasariipput.

Toqutsineq sumik aallaaveqarnersoq politiit suli ilisimanngilaat.

Politiit Svendborgimut inissiamut juunip 22-ani aggersarneqarput, arnarlu toqungasoq nassaaraat. 

Angut arnarlu najukkamiittut tigusarineqarput, inatsillu tunngaviusoq naapertorlugu killisiorneqarlutik.

Angut 44-nik ukiulik killisiorneqareerluni iperagaavoq, arnarlu 33-nik ukiulik toqutsisutut pasineqarluni parnaarussivimmi juulip 21-ata tungaanut tigummigallagassanngortinneqarpoq.

Tamannalu aggustip qulinganut sivitsorneqarpoq.

Arnap toqungasup nassaarineqarneraniilli suliaq Fynip politiivisa misissuilerput, politiilli misissuinerminni maanna utaqqiinnaleqqapput.

- Toqutsiffiusumi misissuinitta inerneri maanna utaqqivagut. Toqutsiffiusumi atortut misissorneqarnerisa inerneri ilaatigut utaqqivagut, Jack Liedicke oqarpoq.

Atortut suut pineqarnersut politiit oqaatigiumanngilaat, toqutsisoqarsimassangatinneqartulli pinnginnerani najukkami ernguteqatigiittoqarsimarpasinnerarnikuuaat.

Suliap misissuiffiginera qanoq sivisutigissanersoq politiit suli naluaat.

Arnap tigusaaqqasup toqutsisutut pasineqarnini qanoq isumaqarfigineraa ilisimaneqanngilaq.