Arnaq sikkilertoq aporneqarluni ajunaarpoq
Arnaq cykilerluni Nuummi Qinngutsinnukartoq bussinit ualigaa aporneqarpoq. Cykilertoq, Sermitsia.AG naapertorlugu 65-inik ukioqartoq, Nuummi napparsimmavissuarmi pinerlisut saaffiginnittarfiannukaanneqarpoq, kinguninnguali toqusoq nalunaarutineqarluni.
Aqqusinikkut angallannermi ajunaarneq politiinit pisarneq malillugu misissuivigineqalerpoq.
Ajunaartup ilaqutai qanigisaalu politiinit ilisimatinneqareerput.
Aporsineq Ikuallaaviup qanittuani pivoq, taamaammat nermallak, tassa rundkørseli, Nuummi naluttarfiup Maliup qulaatungaaniittoq, Qinngutsinniillu Mittarfimmut aqquserngit naapiffiat, Nuummi politiit asserpaat.
Ajutoornerup kinguneranik biilertut timmisartoqarfik eqqaqquttariaqarpaat, tassa Qinngutta illoqarfiullu akornatigoorniarunik, politiit assersuinermik taamaatitsinissaata tungaanut, Nuummi politiit ilisimatitsipput.
Ajutoorneq bussimut 1A-mut ilaasunut aamma annilaarnartorujussuuvoq. Taakku ikiorserneqarnissaat Nuup Bussiinit neqeroorutigineqarpoq.
