Politiit ullormut nalunaarusiaat: Arnaq serpalittaat qasilitsulik atorlugu tigusaavoq
Angerlarsimaffimmi eqqissiviilliortoqartoq Sisimiuni politiit ataasinngornermi unnukkut aqqanermut qiteqqunnerata missaani nalunaarfigineqaramik ornigutilertoramik illuinnarsuutitik amusariaqarsimagaat, Kalaallit Nunaanni politiit pigaartuisa ittuat Mark Larsen oqarpoq.
- Aap, tappikani politiit illuinnarsuutitik amusimagaat ilumoorpoq. Saveqartoqarsorisimavaat, saveqarsorisaalli saveqanngitsoq paasigamikku illuinnarsuusersunngillat, taanna oqarpoq.
Sisimiuni politiit eqqissiviilliorfiusumut anngukkamik illup saani inoqaaluppoq, saveqartoqartorlu taannalu kiunersoq politiinut oqaatigaat. Saveqarneragaallu eqqissiviilliorfiusumiit anigami politiit oqarfigaat assani qullassagai, taamaaliorumanngimmalli politiit illuinnarsuutitik amuaat. Saveqarneragaasorli tigummiaqanngitsoq paasigamikku ajornaquteqanngitsumik tigusareriarlugu politeeqarfiliaassimagaat, politiit pigaartuisa ittuat oqarpoq.
Akuliunniarsarisoqaaluttoq
Politiilli illut saaniittorpaaluisa ilaat arnaq akuliunniarsarimmat aamma tigusarisariaqarsimavaat.
- Akuliunniarsarisoqaaluttorpoq, taamaammat politiit taakkunannga ilaat arnaq serpalittaat qasilitsulik atorlugu tigusariaqarsimavaat.
Allamilli annerusumik pisoqarsimanngitsoq, politiit pigaartuisa ittuat erseqqissaavoq. Angut saveqarneragaareerluni tigusaasoq iperarneqareerpoq, arnarlu serpalittaat qasilitsulik atorlugu tigusaq iperarneqareersimanngikkuni marlunngornermi ullup ingerlanerani iperagaassagunavittoq, politiit pigaartuisa ittuat aamma oqarpoq.
