Arnaq qallunaaq innakkut nakkakattarluni ajunaarpoq

Nuummi politiit nalunaarput arnaq qallunaaq Danmarkimit nunatsinnut nooqqammersoq 28-inik ukiulik ippassaq Ukkusissat tungaanut pisuttuarluni anisimasoq ullumi ajunaarsimasoq nassaarineqartoq.
Allattoq Najaaraq Egede
maajip 17-at 2008 16:54

Arnaq tallimanngornerup ualiani angerlamut uterniarluni oqarsimavoq, sulisitsisuatalu maqaasilerlugu, politiinut nalunaarutigaa.

Arnaq ullo’qeqqata kingorna nassaarineqarpoq.

Qaqqakkut 800 meeteriusukkut ammut 300 meeterit missaanik nakkakattarsimavoq, ingerlaannarlunilu 28-inik ukiullip toqusimanissaa qularinagu, Nuummi politiit pisortaat Bent Heiselberg oqarpoq.

Politiit sakkortunerpaamik inassutigaat nunamut pisuttuarniaraanni, pingaartumillu Ukkusissamut pisuttuassagaanni, pinngitsoorani allamik allanilluunniit ilaqartarnissaq.

- Ukiut tamaasa kisimiillutik pisuttuarnerminni ajutoortunik annaassiniartarpugut, tamannalu pinaveersaartariaqarpoq.

- Ukkusissat eqqaalu angallavigissallugu ulorianartorujussuuvoq. Ataasialinngilagut quaallutik tutinerlullutilluunniit nakkartunik tusartarluta, aamma innartaani nikinnaveeqqasut tusartaannarpagut.

Ajoraluartumilli ullumi tassa assersuummik alianaqisumik takoqqippugut. Arnaq 28-nik ukiulik nakkarluni ajunaarpoq, Bent Heiselberg oqarpoq.

Arnaq sulisitsisiminit maqaasineqalermat ullumi ujaasineq politiinngornianit ingerlanneqarpoq, tassalu toqungasoq nassaarineqarluni.

Air Greenlandip helikopteriata ujaaseqataatinneqartup sumiissusersisimagaa, Nuummi politiit pisortaat oqarpoq.

Ajunaartup ilaqutai kalerrinneqareerput.