Arnaq pisuinnaat aqqutaatigoortoq aporneqartoq

Angut 60-it sinnerlugit ukiulik Nuummi arnamik pisuinnaat aqqutaatigut ingerlasumik apuisimasutut tigusarineqarpoq. Angut imigassartorsimasoq politiit oqaatigaat.
Assi © : KNR
Allattoq Kenneth Elkjær
juunip 30-at 2018 17:41
Nutserisoq Ane-Marie Petersen

Arnaq 50-it missaani ukiulik pisuinnaat aqqutaatigut Nuummi HJ Rinkivaajimi blokkit 4-5-illu akornatigoortoq biilinik arfininngormat ualigaa aporneqarpoq.

Arnaq pisuinnaat ikaartarfiatigut ingerlatillugu pisoq pivoq, biilinik aquttoq imigassartorsimasoq politiit paasissutissiissutigaat.

- Takkuitsoorsimavaa. Angutip piaaraluni arnamut apuiniarsimaneranik takussutissaqanngilaq qujanartumik, pigaartut pisortaat Gedion Quist taama oqarpoq.

Angut ingerlaannaq tigusarineqarpoq, taannalu eqqartuussivimmut sassartinneqassanersoq pigaartut pisortaata oqaatigisinnaanngikkallarpaa. Politiit misissuinerannit tamanna aalajangiiffigineqarumaartoq Gedion Quist oqarpoq.

Arnaq Dronning Ingridip napparsimavissualiaanneqarpoq, ajoqusersimanersorlu politiinit oqaatigineqarsinnaanngikkallaarluni.