Arnaq persuttarneqarluni taliiarpoq
Sapaatip akunnerata qaammatip naalernerani naanera nunatsinni eqqissisimaffiugaluartoq, Paamiuni politiit ulapaarsimaqaat.
Paamiuni politiit arfineq marloriarlutik eqqissiviilliortunukartariaqartarsimapput. Taakkunannga marluk sakkortuumik persuttaaviusimallutik.
Angut inersimasoq arnanut marlunnut sakkortuumik persuttaasimasutut unnerluunneqassaaq, arnap persuttarneqarsimasup aappaata talia napisimavoq.
Angut alla ullup ingerlanerani aamma tigusarineqarpoq, sakkortuumik persuttaasimasutut unnerluutigineqassalluni.
-Sapaatip akunnerata siulianut sanilliullugu eqqissiviilliornerit ornitavut ikinnerupput, taamaattorli suli amerlavallaarput, Johan Barlaj, politiiugallartoq, taama oqarpoq.
Politiit arfineq marloriarlutik ornigunnerini, pingasut tigusarineqarput, suliassallu sisamat ingerlateqqinneqassallutik.
Ilulissani sapaatip akunnerata siuliani pisiniarfiit marluk tillinniarfigitissimapput. Atersuit Kiosk tillinnianit qassiunerinik suli ilisimaneqanngitsunik aningaasanik tilliffigitippoq, Pilersuisullu tankeqarfia aamma aningaasanik tillinniarfigineqarsimavoq.
Atersuit Kioskiannut tillinniarnermut tunngatillugu politiit pasitsaassaqanngillat, suliarli suli ingerlanneqartoq, politeeq Nuka Petersen oqarpoq.
