Arnaq peqquserluuteqartarsimasutut eqqartuunneqartoq

Arnaq Nuumminngaannersoq Pinerluttunik isumaginnittoqarfimmit ukiuni marlunni nakkutigisassanngorlugu ataasinngornermi eqqartuunneqarpoq. Arnaq assigiinngitsunik pinerluuteqartarsimavoq ikiaroornartumillu eqqussisimalluni. Arnap ilaatigut mattammut 10 kilomut akiliutit tigusimavai mattaalli pisisumut nassiunnagit.
Assi © : KNR
Allattoq Kathrine Kruse
septembarip 13-at 2018 15:30

Eqqartuussisoqarfik Sermersooq arnamut Nuummeersumut Pinerluttunik isumaginnittoqarfimmi ukiuni marlunni nakkutigisassanngortitsilluni ataasinngornermi eqqartuussivoq. Arnap ukiuni marlunni nakkutigisassanngortinneqarnermi nalaani imigassamik ikiaroornartumillu atornerluinerminut katsorsarneqartussanngorlugu ilanngullugu eqqartuunneqarpoq.

Arnaq pissutsini aqqaneq-marlunni unnerluussaaffigisamini pisuni qulingiluani pisuutinneqarluni eqqartuunneqarpoq, ilaatigut aqissit, raajat, tuttut neqaat, appat aamma mattaat tuusintilinnik naleqartut internettikkut tunisarsimammagit, pisisunulli nassiunnagit.

Eqqartuussivimmi arnap nassuiaatigaa tunisami ilai nassiunniarlugit siunertaqarsimagaluarluni, kisiannili malugisimaarpallaarami nassiussimanagit.

Arnaq aamma arlaleriarluni tillissimasutut eqqartuunneqarpoq.

Peqquserluuteqartarsimasutut eqqartuunneqartoq aamma Danmarkimit Nunatsinnut ikiaroornartumik hashimik 312 grammimik 2015-imi aggustimi eqqussisimasutut eqqartuunneqarpoq.

Unnerluussisussaatitaasut arnap qaammatini pingasuni Pinerluuteqarsimasunut inissiisarfimmiitinneqarnissaa taarsiisussanngortinneqarnissaalu piumasaraat.

AAMMA ATUARUK Arnaq peqquserluuteqaqattaarnermut unnerluutigineqartoq

Kisianni arnaq maanna atornerluinerminut katsorsarneqarmat Eqqartuussisoqarfik Sermersooq isummerpoq pinerluuteqarsimasunut inissiisarfimmiititsinissamik eqqartuussinissaq tulluanngitsoq.

Eqqartuussisoqarfik Sermersuumit arnap siusinnerusukkut peqquserluuteqarsimanini pillugu eqqartuunneqarsimanera aamma pisut kingulliit unnerluussutaasut ukiup ataatsip matuma missaani pisimammata, arnaq inissiisarfimmiittussanngorlugu eqqartuunneqarsinnaagaluartoq nalileraluarpaa.

Kisianni eqqartuussinermi uani unnerluussutaasut arlallit ukiut arlallit matuma pisimammata, kiisalu arnaq maanna atornerluinerminut katsorsarneqarmat, eqqartuussiviup inissiisarfimmiititsinissamut eqqartuussinissaq tulluartinngilaa.

Taamaattumik Pinerluttunik isumaginnittoqarfimmit arnaq ukiuni marlunni nakkutigineqartussanngorlugu, nakkutigineqarnermilu nalaani imigassamik ikiaroornartumillu atornerluinerminut katsorsarneqartussanngorlugu eqqartuuppaa.

Nuummi politiit ilisimatitsipput unnerluussisussaatitaasut eqqartuussut akuerigaat, peqquserluffigineqartullu aamma unnerluussisussaatitaasunit ilitsersuunneqarumaartut inuinnaat saqitsaassusaannik suliassanngortitsisarneq aqqutigalugu taarsiiffigineqarnissaminnut piumasaqarnissaannut.