Arnaq Pakistanimioq taxani ernisariaqarsimavoq
Pakistanimi illoqarfimmi Quettami arnaq ernisuttoq taxanut ammasunut motoorinngualinnut ilaatilluni, aqqutaani ernisariaqarsimavoq, Pakistanip præsidentiata biilit malittai amerlangaarmata ingerlariaqqissinnaajunnaarnermi kinguneranik.
Allattoq Jaaku Lyberth
Arnap taassuma qatanngutaatalu politiit paasitinniarsimagaluarpaat, arnaq taanna ernisummat ikiorneqartariaqarlutik. Tamannali iluaqutaasimanngilaq, præsidentip taassumalu malittai biilit ingerlareerpata aatsaaat ingerlaqqissinnaasut ilisimatinneqarlutik.
Pakistanimi præsidentip Asif Ali Zadarip pisoq tusaramiuk ajuusaarpoq, arnamullu tassunga pisortatigoortumik utoqqatserluni.
- Biilinut ingerlaarfiusinnaasunik nutaanik nassaarniartariaqarpugut, allat akornusersorneqaqqunagit, Pakistanip præsidentia Asif Ali Zadari taama oqarpoq.
Anaanaq meerartaavalu ajunngitsut tusagassiorfiit nalunaarutigaat.