- Biilinik ingerlatsisoq misissorparput, imigassartorsimanngilaq aanngajaarniutinilluunniit tigusisimanani. Apuiffiup nalaani taartorujussuusoq misissuinerit takutippaat, arnarlu aporneqartoq taartunik atisaqarsimavoq, biilinillu ingerlatsisoq arnaq takusinnaasimanagu, Mads Lynge, Nuummi politiineersoq oqarpoq.Assi: KNR

Arnaq Nuummi biilinit aporneqarnermi kingorna toqusoq

Politiit tallimanngornermi unnukkut unnuakkullu ulapissimaput. Arnaq Nuummi biilinit aporneqarnermi kingorna toquvoq. Imigassartorsimallutik biilinik ingerlatsisut sisamat politiinit taassuma saniatigut tigusarineqarput.

Nuummi politiit tallimanngornermi unnukkut unnuakkullu ulappupput. Arnaq biilinit ippassaq unnukkut aporneqarpoq, arnarlu unnuaq toqulluni. Taassuma saniatigut imigassartorsimatillutik biilinik ingerlatsisut sisamat Kalaallit Nunaanni Politiinit tigusarineqarput.

Arnaq 71-inik ukiulik Nuummi biilinit tallimanngornermi unnukkut nalunaaqutaq qulingiluat missaanni aporneqarpoq, arnarlu taanna unnuaq toqulluni.

Kalaallit Nunaanni Politiit pigaartuisa pisortaat Mads Lynge KNR-imut taama ilisimatitsivoq:

- Arnap Blok 6-ip nalaani aporneqarsimaneranut kalerrinneqarpugut. Aportiffiup nalaanut orniguppugut, ambulancemillu soorunami aamma aggersaalluta. Arnaq 71-inik ukiulik aporneqarsimasoq paasivarput, politiineersoq oqarpoq, nangillunilu:

- Arnaq ajoqusingaatsiarsimasoq paasinarsivoq, sulili uumalluni. Napparsimmaviliaanneqarnermili kingorna toqukkut unnuaq ajoraluartumik qimaguppoq, politiit pigaartuat oqarpoq.

Unnerluutiginnittoqanngitsoq

Apuiisoqarneranut atatillugu inatsisinik unioqqutitsisoqarsimanngitsoq paasinarsivoq.

Angut biilinik ingerlatsisoq mianersuaalliorluni ingerlatsisimanngitsoq takunnittup politiinut oqaluttuaraa. Sukkavallaamillu allatulluunniit ulorianarsinnaasumik ingerlatsisoqarsimanngitsoq politiit misissuinerisa aamma takutippaat.

AAMMA ATUARUK Toqutsinermik sulialik: Ikioqatigiilluta pinerlunneq peqqarniitsoq paasiniartigu

- Biilinik ingerlatsisoq misissorparput, imigassartorsimanngilaq aanngajaarniutinilluunniit tigusisimanani. Apuiffiup nalaani taartorujussuusoq misissuinerit takutippaat, arnarlu aporneqartoq taartunik atisaqarsimavoq, biilinillu ingerlatsisoq arnaq takusinnaasimanagu, Mads Lynge, Nuummi politiineersoq oqarpoq.

Biilinik ingerlatsisoq angerlarsimaffimminit ingerlaqqammerluni biilit unittarfiannit aqqusinermut sangugami arnaq tassani aporpaa. Arnaq aporneqarnermini ajoqusingaatsiarpoq biilillu ataannut pilluni.

Aporsisoq tupaqqasoq, aporsinermilu kingorna sunnertisimaqisoq poltiit oqaatigaat.

Imigassartorsimallutik tallimanngornermi unnuakkut biilertut sisamat

Naak apuisoqarnerani inatsisinik unioqqutitsisoqanngitsoq, aporsinermi qanoq pisoqarsimanersoq politiit misissussavaat.

Alianaqisumik apuisoqarnerata saniatigut imigassartorsimallutik biilinik ingerlatsisut sisamat politiinit tigusarineqarput. Nuummi pingasut, Qaqortumilu ataaseq.

- Tallimanngornermi unnukkut pisarnermit ulapinneruvugut. Imigassartorsimallutik biilinik ingerlatsisut Nuummi pingasut unitsippagut, Qaqortumilu ataaseq. Angerlarsimaffinni eqqissiviilliornerit, aqqusinermi perulluliornerit aalakoortullu aamma orniguffigisariaqarsimavagut, politiit pigaartuisa pisortaat oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat