Arnaq: Nipangiusseqqusaavunga

Tusagassiuutitigut nalunaarut januaarip ulluisa aqqarnanni 2008-meersoq Inatsisartut Allattoqarfiannit pisortamit Nicolaj Sørenseniminngaanneersoq tunngavigalugu suliassaq maannakkorpiaq oqaaseqarfigissallugu pisariaqartutut isigaara. Suliassap tusagassiuutini inissinneqarnera uannut soqutiginaateqanngikkaluarpoq. Kissaatigisarali unaavoq suliassap iluameersumik misissuiffigineqarnissaa.

Pisut ingerlanerat pillugu makkua nalunaarutigisinnaavakka:

Juulip qaammataani 2007-imi ataatsimeersuarnerup naggataarnerata naggataarlunilu nerinerup kingorna Katuami Inatsisartut siulittaasuata angerlarsimaffiani uannut pisimasut pillugit aqutsisut ilisimatippakka. Tamatumani Inatsisartut siulittaasuata inuk suliamut tunngassuteqartoq pillugu ataatsimiinnissap pilersaarusiornerani ikiortaanissara kissaatigaa. Tassunga ilassutitut uanga inuillu suliamut tunngassuteqartut marluk qaaqquneqarput.

Inatsisartut siulittaasuata illuani pulaarnermi anartarfiliarninni taassuma nalusannik malissimavaanga. Tusaavara tupallungalu kingumut qiviarlunga. Tigupiloorpaanga attualaarlungalu, taamaateqqugaluaranni ingerlaqqullunilu taamaaliortuarpoq. Nammineerlunga peersinnaanngilanga. Tamatuma kingorna qanoq pisoqarsimanersoq erseqqissumik eqqaamasaqanngilanga, aatsaalli nalunaaqquttap akunneri arlallit qaangiuttut paatsiveqarpiarnanga taxanut inissinneqarlunga. Taxamiillunga suli eqqarsarluarsinnaanngilanga inullu aammattaaq Inatsisartut siulittaasuata illuaniittoq ilagalugu. Taassuma taxami sakkortuumik attualaarniarsaraanga. Atoqatigiinnermut tunngasunik ingasattunik oqaluinnavippoq. Erseqqilluinnartumik itigartippara. Ininnut apuunninni suli paatsiveerusimaaqaanga, annilaarutigeqisannillu paasillugu angutit qarliinik angigeqisannik atisitinneqarsimallunga uangalu nammineq qarliikka iluatiguukkalu peqaratik. Taamaattumik matuersaatikka aamma nassanngilakka taamaattumillu suleqatinnukartariaqarlunga. Arnap taassuma atugarliorpaluttutut isikkoqarninni ilassilluarpaanga. Aqaguani taassuma oqaluttuuppaanga assut sakkortuumik kingunerlutsisisutut pissuseqarsimasunga.

Qaammatit kinguliini arlaleriarlunga qarliikka, iluatiguukka matuersaatikkalu kiisalu nassuiaanissaq apersuutigisaraluarpakka, kisiannili utaqqisinneqartarlunga, itigartinneqartarlunga soqutiginngitsuusaarneqartarlungaluunniit. Angutit taakku marluk nipangiusseqqullunga puigueqqullungalu qinnuigaannga.

Suliassaq politiinut qaammatit arlallit aatsaat qaangiummata nalunaarutigigakkit tamanna assorsuaq annilaarsimaninnik tupassimaninnillu pissuteqarpoq. Pisoq nalunaarutigigukku Kalaallit Nunaanni suliffimma siunissamalu annaanissaat annilaanngatigaara.

Taamaattorli nalunaarutiginninnissaq toqqarakku tamanna pissuteqarpoq paasilerakku suliassaq inaarneqartariaqartoq. Taamaaliorpunga tamatuma uannut imaannaanngitsunik nuanninngitsunillu kinguneqarnissaa apeqqutaatinnagu. Taamaattumik suliassaq politiinut 2007-imi aggustimi nalunaarutigaara.

Tamatuma kingornagut allakkat politiit suliami misissuinermik unitsitsisimanerannut tunngasut tiguakka. Aalajangiinermut tunngavigitinneqarpoq politiit isumaat naapertorlugu pinerlunnermut tunngasumik iliuuseqartoqarsimanera ilimagineqanngimmat, ilaatigut pissutigalugu Inatsisartut siulittaasuata attualaarineri uanga nammineq nassuiaanera naapertorlugu imatut inngimmata, taakkua Pinerluttulerinermi inatsit naapertorlugu nakuusernertut isigisariaqarlutik.

Taamatut aalajangiineq naammaginngilara isumaqanngilangalu suliassaq naammattumik misissuiffigineqarsimasoq. Taamaattumik innuttaasutut pisinnaatitaaffiga atorpara Naalagaaffiullu eqqartuussisuuneranut politiit aalajangiinerat naammagittaalliuutigalugu.

Naalagaaffiup eqqartuussisuunerata decembarip tallimaanni 2007-imi nalunaarutigaa ullut 60-it ingerlaneranni aalajangiisoqarnissaa ilimagisinnaagiga.

Suliap tamanut saqqummiunneqarnissaanik aallaqqaataani annilaanganerigaluara peeruppoq. Nikanarsagaanernik pineqarnera taakkualu saniatigut tamatuma isertuunneqarnera, tassalu nikanarsaasut annilaanganeq pissutigalugu illersorneqarnerat. Taamaaliorusunngilanga. Unnerluussissutit pisortatut qullersarisara peqatigalugu tusagassiuutitigut paasisakka arajutsilluinnarpakka. Paasiuminaatsippara taamatut iliornissaq tamanna pisariaqarsimanersoq, aammalumi takusinnaanngilara tamatumani suna siunertarineqarnersoq.

Maannakkorpiaq suliassaq pillugu allanik oqaaseqaateqarusunngilanga, aammalu uanga ilaquttakkalu pissutigalugit kinaassusera sapinngisamik isertuukkallassallugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat