Arnaq Københavnimi qiminneqarpoq

Kalaaleq arnaq 32-nik ukiulik Københavnimi angummit inooqatiminit Polenimiuusumit 34-nik ukiulimmit qimillugu ippassaq unnukkut toqunneqarpoq.
Allattoq Najaaraq Egede
maajip 16-at 2010 13:36

Angut aalakoortorujussuulluni kioskimut 7-elevenimut isersimavoq oqarlunilu aappani toqoqqammerlugu. Pisiniartitsisoq erngerluni politiinut kalerriimmat kinguninngua arnaq kalaaleq qiminneqarsimalluni ininimi toqungasoq politiit nassaataat.

Københavnimi politiit annerusumik oqaaseqarsinnaanngikkallarput, arnap ilaqutai suli ujaramikkit.

Arnap ernera arsaarinnissutaasimasoq ilaqutariinni allani najugaqarpoq.

Politiit oqaatigaat aappariit imigassamik ikiaroornartumillu atornerluisutut ilisimaneqartut.

Polenimiu killisiorneqarnermini aalakoornermik eqqaamasaqarani oqarsimavoq, uffa politiinit oqaloqateqaqqaarnermini nassuereerluni erngunnerminni aappani qimissimallugu, inissiamilu sorlermi init ilaanni timaa sumi madrasip qaavaniinnersoq nassaarisinnaagaat tikkuarsinnaasimallugu, taama Ritzau allaaserinnippoq.

Kalaallimik arnamik toqutsisutut angut 34-nik ukiulik juunip ulluisa qulingiluaata tungaanut tigummigallarneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq