Arnaq inuusuttoq hashimik 2 kiilungajannik eqqussilluni tigusaasoq
Arnap suli 30-liineqanngitsup ikiaroornartumik hashimik qaammatip siuliani eqqussigami akisunaarpaa.
Narsarsuarmi mittarfimmi naliginnaasumik misissuisoqarnerani arnaq nassatami akornanni hashimik 1,7 kiilumik nassataqartoq nassaarfigineqarpoq.
Tassanngaanniillu suut tamarmik sukkasuumik pipput. Arnaq inuusuttoq tigusaavoq, kingornalu eqqartuussivimmi killisiorneqarluni, suliallu ingerlarngani tigummigallarneqarluni. Maannalu qaammat ataaseq qaangiutiinnartoq qaammatini arfinilinni pinerluuteqarsimasunut inissiisarfimmiittussattut pineqaatissinneqarpoq.
AAMMA ATUARUK Nuummioq Roskilde Festivalimi hashinik arsaagaasoq
Pineqaatissinneqarnerup saniatigut pineqaatissinneqarsimasutut allagartaqalerpoq suliallu ingerlarnga akilertussanngorlugu.
Hashimik eqqussineq sianiilliornerusoq politikommisæri Laila Thomassen Fleischer isumaqarpoq.
- Arnap pineqartup aasaanerani sulinngiffeqarneq naallugu inissiisarfimmiittussanngorpoq pineqaatissinneqarsimasutullu allagartaqalerluni. Siunissami suliffeqarnissamik takorluugaqaraanni tamaanna akisuvoq. Pinerlunneq imminut akilersinnaanngilaq, Laila Thomassen Fleischer tusagassiuutinut allappoq.
Suliap politiinit misissuiffigineqarnerani angut suli 40-liinngitsoq, hashimik Danmarkimi pisisimasutut Qaqortumilu ikiaroornartumik tigusisussatut tigusaasimasoq tigummigallagaasorlu politiit ilisimatitsipput.
Ikiaroornartoq 1.700.000-t koruunit angullugit isertitsissutigineqarsimasinnaassagaluarpoq, apeqqutaalluni Nunatsinni illoqarfimmi tuniniarneqarnersoq tuniniaasullu qanoq tuniniaanersoq.
AAMMA ATUARUK Kalaallit Nunaat hashimut naaggaarpoq
AAMMA ATUARUK Aalisartut hashimik pujortarsimasut niutitaasut