Inuit qulit ikiaroornartumik hashimik nunatsinnut anngiortumik ukioq ataaseq sinnerlugu eqqussuisimasut ilaata ataatsip, tassa arnap 48-inik ukiullip Koldingimeersup, nunatsinnut hashimik 11 kilomik eqqusseriarsimanini pissutigalugu septembarip qulingiluaannili parnaarussimaneqalersup parnaarussimaneqarnera novembarip 15-iata tungaanut sivitsorneqartoq, nunatsinni politimesteri Steen Thomsen Danmarksradioani apersorneqarluni oqarpoq.
Arnap 48-inik ukiullip Koldingimeersup parnaarussaanerata sivitsorneqarnissaa pingasunngormat eqqartuussinermi aalajangerneqarpoq.
Nunatsinnut ukioq ataaseq sinnerlugu hashimik anngiortumik eqqussuisimanermi peqataasimasut qulit ilaat tallimat pineqaatissinneqareerput.