Ikiaroornartoq politiiniit arsaarinnissutaq. Toqqorsivimmit.Assi: Malik Brøns / KNR

Arnaq hashimik anngiortumik eqqusseriaraluartoq tigusarineqartoq

Arnaq 30-inik ukiulik hashimik anngiortumik 1 kiilumik ippassaq eqqusseriaraluartoq tigusarineqarpoq.

Kalaallit Nunaata politiivisa arnaq 30-nik ukiulik hashimik anngiortumik eqqusseriaraluartoq ippassaq ataasinngornermi tigusaraat.

Arnaq 30-nik ukiulik hashimik anngiortumik eqqusseriaraluartoq, ippassaq Kangerlussuarmi tigusarineqarpoq. Taassuma hashi timimini toqqoqqatillugu eqquteriaraluaraa, politiit pigaartuisa naalagaata Bruno Brixip oqaatigaa.

Arnaq Sermersuup Eqqartuussiveqarfiani ullumikkut aqqarnup-qeqqa sassartinneqassaaq.

Ikiaroornartumik eqqussinerit amerliartorput. Nunatsinnut ikiaroornartumik anngiortumik eqqusseriaraluarlutik siorna tigusarineqartut 2021-mi tigusarineqartunut sanilliullugit pingasoriaammik amerlanerupput. Tigusarinninnerillu amerlanerpaat hashimik anngiortumik eqqusseriarnerupput.

AAMMA ATUARUK Angutit marluk annertuumik ikiaroornartulerisimasutut pineqaatissinneqarsimasunut inissiisarfimmiittussanngortinneqartut

Angut Qaqortumeersoq ikiaroornartumik iioraasimanini siorna oktoberip 20-ani toqqutigaa. Taanna hashinik poortornikunik iioraasimavoq, taakkulu erlaviinut katersuussimapput aseruuttoorninilu toqqutigisimavai.

Taanna kiaroornartumik iioraasimallutik eqqusseriaraluarlutik toqusut, ukiup affaata ingerlanerinnaani pingajoraat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl