Arnaq Grove: Kalaallisut oqaatsivut nutsiinnagaavallaaqaat
Taassuma kalaallisuinnaq oqaasillit tamanut oqallitsitsinernit katataajartulernissaat annilaanngatigaa.
Tamatuma kingunerisinnaavaa aammalu isumaqarpunga kingunerissagaa amerlanerujartuinnartut katataajartulernissaat, tassa nutaarsiassat sunniuteqanngissusiat qatsunneqalissaaq kalaallit oqaasii kukkusumik siaruarneqartalissappata. Arlalippassuartigut qallunaatut oqalussinnaasariaqartarpoq kalaallisut qanoq isumaqarneri paasisinnaassagaanni, tassami saniatigut qallunaatut paasisinnaagaanni taakkua niaqqumi nutserneqarsinnaammata. Tamannali qallunaatut oqalussinnaanngitsunut oqaluppiarsinnaanngitsunulluunniit ajornartorsiuterujussuusinnaavoq, pissutigalugu nutaarsiassat naalakkersuinermut tunngasut, Kalaallit Nunaata avataani pisut pillugit paasissutissat allarpassuillu amerlaqisut paasineqarneq ajormata.
- Ajornartorsiut unaagajuttarpoq kalaallisut oqaluttuarineqartut oqaluttuarineqartunit qallunaatuunit toqqaannartumik nutsigaasarnerat, tamatumalu kingunerisarlugu assersuutigalugu qallunaatut oqaatsit inissitsiternerat qallunaallu oqaatsinik atuinerat toqqaannartumik kalaallisuunngortinneqartarnerat.
Ajornartorsiuterujussuuvoq imaannguatsiarmat qallunaat oqaasii nutaarsiassalerinermi pingaarnerusumik oqaasiummata, nutaarsiassallu qallunaatut allanneqariarlutik kalaallisut nutserneqartarlutik. Taamatullu tassa ajutoortoqartarpoq nutserinermi qallunaatuut tunngavigineqarpallaartarmata, soorlu assersuutigalugu oqartoqarpat nujai allakkanik nakkartitsisarfimmiittut
taavalu kalaallisut toqqaannartumik nutserlugu, taamaalillunilu arlalippassuarnit paatsoorneqarluni uffa imaanniassagaluartoq, misiariaqqiffeerullugu paasineqartoq. Aamma takusarparput qallunaat oqaatsiminnik inissitsitinerat atorneqartartoq.
Kalaallit oqaasiisa ineriartorsinnaassusiat naleqqussarsinnaassusiallu pillugit Arnaq Grove maannakkorpiaq ilisimatusaatitut pilersaarusiorpoq.