Arnaq arfininngormat qummoroortartoq unnerluutigineqarpoq

Isikkamik arsaalluni pissartanngorniunnerni arfininngormat ajugaaniutivittoqarnerani qummoroortartoqarmat isiginnaariallu ilaat niaqqumigut eqqorneqarpoq. Qummoroortitsisimasoq inuunermik ulorianartorsiortitsisimasutut maanna unnerluutigineqarpoq, Nuummi politiit ittuat Bent Heiselberg ilisimatitsivoq.
aggustip 13-at 2007 10:41

Qummoroortitsisoq arnaasimavoq, taanna killisiorneqareerpoq, nassuereerlunilu ilumut nammineq qummoroortartumik aallartistsisimalluni.

Arnaq inoqammi inuuneranik ulorianartorsiortitsisimasutut unnerluutigineqartussanngorpoq, akiliisitaanermik tamanna kinguneqarsinnaavoq, imaluunniit pinerluuteqarsimasunik inissiisarfimmiittussanngortinneqarsinnaalluni.

Politiit maleruaqqusaannik unioqqutitsisimasutut arnaq unnerluutigineqaannarsinnaagaluarpoq, qummoroortartumilli aallartitsineq politiit ima ulorianartigisutut nalilerpaat pinerluttulerinermik inatsit najoqqutaralugu unnerluutigineqassasoq.

Arnaq niaqqumigut eqqorneqartoq qaamigut kilerpoq, kilernera mersorneqarluni, qaratsamigullu sajuppillatsitsisimanasoralugu misissorneqarluni. Isiginnaartut allat atisaat aamma aserortersimasut, Bent Heiselberg ilisimatitsivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq