Arnaq alla aamma tigusaavoq

Ilulissani arnaq 23-nik ukiulik ikiaroornartumik 8 kg-mik tuniniaanermi peqataasimasutut ukiuni marlunni pinerluuteqarsimasunut inissiisarfimmiittussanngorlugu ippassaq eqqartuunneqarpoq. 50.000 koruunit aamma arsaarinnissutigineqarput, arnallu pineqaatissinneqarnini akueraa.

Ikiaroornartuerniarneq annertooq pillugu suliassamut eqqartuussineq ilaavoq, nunatsinni Danmarkimilu ataatsimoortumik iliuuseqarnikkut inuit arlallit ukioq manna aggustip ulluisa aqqarnganni tigusarineqarnerannik kinguneqartumi.

23-nik ukiullip saniatigut arnaq 21-nik ukiulik ukiuni marlunni pinerluuteqarsimasunut aamma inissiisarfimmiittussanngortitaareerpoq, arnaq 26-nik ukiulik qaammatini qulini, kiisalu angutit marluk 34-nik 37-nillu ukiullit tamarmik immikkut qaammatini tallimani pinerluuteqarsimasunut inissiisarfimmiittussanngorlugit eqqartuunneqareerput.

Suliassami pineqartumi angutit pingasut nunatsinni suli tigummigallarneqarput, arnarlu 48-nik ukiulik Danmarkimi aamma tigummigallarneqarluni.