Arnaq 90-inik ukiulik coronavirusimut akiuussutissamik Tuluit Nunaanni siullersaalluni kapitittoq

90-inik ukiulik, Margaret Keenan, Tuluit Nunaanni siullersaalluni covid-19-imut akiuussutissamik Pfizer/BioNtechimeersumik ullumi marlunngornermi kapitippoq.

Taanna Tuluit Nunaanni Coventryip napparsimmaviani ilisimatusarfiutigisumi kapitittoq, nutaarsiassaqartitsivik Ritzau allappoq.

- Napparsimmavinni 70-ini ullumimiit kuppilersuisoqalissaaq, tuluit peqqissutsimut ministeriat Matt Hancock oqarpoq.

Akiuussutissat pilersaarutit malillugit tunniunneqarnissaat oqartussat qularinngilluinnaraat, taanna erseqqissaavoq.

Utoqqaat illuanni juullinnginnerani kuppilersuisoqalernissaa ilimagigitsik, ministeri oqarpoq. Sanngiinnerit kapitereerpata killilersuinerit atorunnaarsinneqassasut, taassuma ilanngullugu oqaatigaa.

AAMMA ATUARUK Tuluit coronavirusimut akiuussutissamik nunani killerni siullersaallutik kapitissinnaalissasut

Nakorsat peqqinnissaqarfippassuarni kuppilersuisuussapput.

Inuit 80-it sinnerlugit ukiullit taavalu napparsimmavinni, utoqqaat illuini nakorsiartarfinnilu sulisut  salliunneqassapput.

- Tuluit akiuussutissamik kapitissinnaanngornernerminni ulluinnarni nalinginnaasumik inuuneqaleqqinnissamik ingerlariaqqinnissatsinnut alloriarfiussaaq, tuluit ministeriunerat Boris Johnson kuppilersuisoqalinnginnerani oqarpoq.

Tuluit naalakkersuisui amerikamiut nakorsaasiorfissuata Pfizerip tyskillu nakorsaasiorfissuat Biontech suleqatigiillutik akiuussutissaliaata immikkut atorneqarnissaanut akuersinikuupput.

Tuluit coronavirusimut akiuussutissamik nunani killerni siullersaallutik kapitissiinnaalissapput.