Arnaq 62-inik ukiulik toqutseriarsimasutut unnerluutigineqartoq
Naqqiissut: Angut suliami unnerluussaasimasutut allaaserisami allaqqagaluarpoq, arnarli Qaanaameersoq unnerluussaaqqavoq. Kukkuneq KNR-imit aaqqinneqarpoq, kukkunerput ajuusaarutigaarput.
Arnaq 62-inik ukiulik, Qaanaameersoq pissutsini marlunni tassa nakuusimasutut pissutsimilu ataatsimi toqutseriarsimasutullu pasineqartoq, Qaasuitsup Eqqartuussisoqarfiani ullumi aqagulu unnerluutigineqassaaq.
Unnerluussissut naapertorlugu arnaq pissutsini pingasuni savimmik kapisisimasutut unnerluutigineqarpoq.
Unnerluussissutip aappaa 2023-mi decembarimi unnukkut nakuusernermut tunngavoq, unnerluussissut naapertorlugu arnap inuk alla naavata talerpiata tungaatigut piaaraluni kapivaa. Pinerlineqartoq 2 centimeterit missaannik takutigisumik kilerneqarpoq.
Unnerluussissut alla 2024-mi oktobarimi unnukkut nalunaaqutaq ataatsip qeqqata missaani nakuusernermut tunngavoq, unnerluussissut naapertorlugu arnap inuk alla sakiaatigut savimmik piaaraluni kapivaa. Pinerlineqartoq unnerluussissut naapertorlugu sakissamigut 2,5 centimeterit missaannik atsigisumik kilerneqarpoq.
Ukiunik arlalinnik pineqaatissinneqassasoq
Arnap unnerluutigineqarnerani kingulleq toqutseriarnermut tunngasoq 2025-meersuuvoq, unnerluussissut naapertorlugu arnap inuk alla savimmik marsip 20-anni unnukkut kapivaa.
Pinerlineqartoq itisuumik inuunermik naleqariaannaasumik aamma inuunermut navianaatilimmik naavata talerpiata tungaatigut tinguanut qanittumik ikilerneqarpoq. Inuuneranilli naleqarsinnaanera nakorsamit piffissaq eqqorlugu passunneqarneratigut pinngitsoortinneqartoq, unnerluussummi allassimavoq.
62-inik ukiulik unnerluussisussaatitaasut piumasaqaateqarneratulli eqqartuussiviup eqqartuutissaguniuk ukiuni sisamani qaammatinilu qulingiluani pineqaatissinneqarsimasunut inissiisarfimmiittussanngortinneqarsinnaavoq.
