Arnaq 38-nik ukiulik toqutseriarsimasutut tigummigallagassanngortinneqarpoq
Arnaq 38-nik ukiulik toqutseriaraluartutut unnerluussaalluni Københavnimi eqqartuussivimmi ulluni 28-ni ullumi tigummigallagassanngortinneqarpoq.
Allattoq Louise M. Kleemann
novembarip 25-at 2008 12:16
Arnaq taanna angullu qallunaaq politiit oqarnerat naapertorlugu erngunnerminni ulloq naallugu assortuussimapput, tamatumalu kinguneraa arnap angut ippassaq unnukkut arfininngulersoq tuiatigut uppataatigullu savimmik marloriarlugu kapimmagu. Dannie Rise Bellahøjimi politeeqarfimmiit taama oqaluttuarpoq.
Angut maanna ulorianartorsiorunnaarpoq, taamatulli pisoqarneratigut arnaq 38-nik ukiulik toqutseriarsimasutut unnerluutigineqarpoq, tamatumalu kinguneranik ulluni 28-ni tigummigallagassanngortitaalluni.
Pinerliinerup nalaani angut kalaaleq inimiissimavoq, kamaattoqarneranulli attuumassuteqanngimmat tigusaasimanngitsoq, pigaartoq Dannie Rise Radioaviisimut oqarpoq.
