Arnaq 18-inik ukiulik aataminit pinngitsaalineqartoq

Arnaq 18-inik ukiulik pinngitsaalineqarsimanini pillugu Aasianni politiinut arfininngormat nalunaaruteqarpoq. Angut 62-inik ukiulik pinngitsaaliisutut pasineqartoq arnamut 18-inik ukiulimmut aataajuvoq.
Allattoq Oline I. Olsen
novembarip 09-at 2009 08:27

- Arnaq tallimanngornerup unnuaani aalakoorpoq, sinilermallu angutip 62-inik ukiullip arnaq 18-inik ukiulik pinngitsaalivaa, Aasianni Politeeq Nuunu Larsen oqarpoq. Angut 62-inik ukiulik pinngitsaaliinermini aalakuunngitsoq aamma oqaatigineqarpoq.

Arnaq 18-inik ukiulik pinngitsaalineqarsimanersoq paasissallugu nakorsamit arfininngormat misissorneqarpoq. Ullullu ingerlanerani angut 62-inik ukiulik politiinit tigusarineqarpoq, taannalu aamma nakorsamit misissuiffigineqarluni.

Nuummi Politimestereqarfimmi inatsisilerituup nalileereernerata kingorna angut 62-inik ukiulik iperarneqarpoq, tigummigallarneqarnissaanut tunngavissaqanngimmat.

- Angut 62-inik ukiulik pinngitsaaliisutut nassuerpoq, Politeeq Nuunu Larsen oqarpoq.

Angut 62-inik ukiulik pinngitsaaliisimasutut kiisalu ilaquttatut qanigilluinnakkamik atornerluisimasutut unnerluunneqarluni eqqartuussivilersuunneqarumaarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq