Kommune Kujalleq: Arnap siusinaartumik soraarnerussuteqalernissani ukiut tallimat sinnerlugit utaqqigaa
Ukiut arfinillingajaat. Kommune Kujallermi innuttaasup sioqqutsilluni soraarnerussuteqalernissani taama sivisutigisumik utaqqisimavaa.
Tamannalu pitsaanngilaq.
Kommunep taama sivisutigisumik sullissinera Ombudsmandip taamaammat isornartorsiorpaa.
Arnaq kommunep 2008-mit 2016-imut allattugaatigisimanngilaa, tamannalu allagaataasiviup inatsisaanut unioqqutitsinerummat Ombudsmandip isornartorsiorpaa.
Pappilissat tammariataaginnartut
Arnaq decembarip 17-iani 2018-imi siullerpaamik saaffiginnittoq kommunep pappiliaataani allaqqavoq.
Arnarlu naapertorlugu suliaq qangalili aallartikkaluarpoq.
Sioqqutsilluni soraarnerussuteqalernissani pillugu kommunemut 2008-imi saaffiginneqqaarnini 2023-mi septembarimi oqaluttuaraa.
Kisiannili arnaq taanna pillugu kommunep 2008-mit 2016-imut pappiliaatiginngilaat, taamaattumillu arnap oqaatigisaa uppernarsarsinnaanagulu naqqiisinnaanngilaat.
Nakorsap allagarsiuuterpassui
Kommunelli pappiliaataani arnaq taanna pillugu ukiuni arfinillingajanni 30-t sinnerlugit ataatsimiittoqarsimasoq takuneqarsinnaavoq.
Arnaq nakorsap allagarsiuutaanik amerlasooriaq aalleqqusaasarsimavoq, sulialli kinguaraluttuinnarnerani nakorsap allagarsiutai qanganitserpallaartarsimapput, arnarlu nakorsap allagarsiuutaanik nutaamik aalleqqoqqittarsimavaat.
Innuttaasunut sullissisarfimmi nakorsap allagarsiuutai kommunep nalunaarsuiffianut nalunaarsorneqanngitsut arlallit sullissisup nassaarinikuusimavai.
Arnap tulluuttumik suliffigisinnaasaanik nassaartoqarsinnaasimanngimmat misiliummik sulitinneqarsimanngitsoq, Majoriap aggustip 19-iani 2019-imi oqaatigaa.
Arnaq taanna pillugu pappilissat kommunemit isumagilluarneqarsimanngitsut oqaatigineqarsinnaavoq.
