Arnap angut unataraa
Arnaq 40-t missaannik ukiulik Aasianni arfininngormat tigusarineqarpoq. Arnaq taanna aapparisaminut angummut annersaasimasoq arfininngormat ualikkut politiinut nalunaarutigineqarpoq.
Allattoq Najaaraq Egede
Arnaq Pineqaatissinneqarsimasunut inissiisarfimmiit misiligummik januaarip 17-iani anivoq, suli ulluni 151-ini inissiisarfimmiittussaagaluarluni, Aasianni politeeqarfimmi ulluinnarni aqutsisoq Aqqaluk Petersen taama KNR-imut ilisimatitsivoq.
Arnap uteqattaartumik nakuusertarnera pillugu tigummigallarneqarnissaa politiinit aalajangerneqarpoq, taamaattumillu Aasiaat Eqqartuussivianut ippassaq sapaammi sassartinneqarluni. Arnap 40-t missaannik ukiullip ulluni 15-ini tigummigallagassanngortinneqarnini akueraa.