Arnanut siunnersuut: Arpallusi nuannaaleritsi

Misissuinerup annertuup takutippaa arnat aalaakkaasumik timigissartartut nikallungalernissaat ilimanannginnerusartoq.
Allattoq Noah Mølgaard
decembarip 22-at 2010 07:55

Siusinnerusukkut takutinneqartareerpoq timigissartarneq inuit nikallungaqqajaalersartut iluaqutigisaraat. Maannalu misissuinerup annertuup takutippaat timigissartarnikkut nikallungalernissaq pinngitsoorneqarsinnaaasoq allaallu nappaatip taassuma takkunnissaa pinngitsoortivissinnaallugu.

Statens Institut for Folkesundhed misissuinermik tassannga ingerlatsisoq paasisaminik saqqummiussivoq atuagassiami nunani tamalaani saqqummersartumi Preventive Medicinemi. Misissuineq taanna sammisami tassanerpiaq misissuisimanerit maannamut annertunersarigaat Statens Institut for Folkesundhed nittartakkamini allappoq.

Østerbromi misissuinermi taaneqartartumi qallunaat 18.000 misissuiffigineqarsimanerat nangillugu ukiuni 26-ini malittarinnittoqarsimavoq. Østerbromilu misissuinerup takutippaa pingaartumik arnat nikallungalernissaq pinngitsoorsinnaagaat aalaakkaasumik timersortarnermikkut.

Arnanngooq timersortanngitsut imaluunnit annikitsuinnarmik tassalu sapaatip akunneranut nalunaaquttat akunneri marluk sivikinnerusumillunniit timigissartartut nikallungaqqaajaalernissaat 1,8-mik ilimanaateqarneruvoq timigissartuartunut sanilliullugu. Annertuumik timigissartartutut taaneqartut tassaapput sapaatip akunneranut nalunaaquttap akunneri sisamat timigissartartut imaluunnit sakkortuumik nalunaaquttap akunneri marlunni sapaatip akunneranut sungiusartartut.

Angutit eqqarsaatigalugit assigusumik paasisaqarput tamannalu arnat pillugit paasisamut sanilliullugu ersernerlunneruvoq.